當肥牛遇上女王時

尋日朝早約十時, 有一班為數約20人的二判工人上來公司追欠薪。
跟呢件事相關的manager 1個返左大陸工幹,
1個(我地部門的直屬manager)在明知有人會來踩場既情況下潛左水唔知去左邊,
而我地阿頭則出左去做野,
剩底一個同我地有牙齒印的technical manager o係度(所有manager都係男人)。


Reception姐姐安排晒班工人入會議室後,
我地既admin officer小姐就入去叫佢地寫低資料和聯絡方法,
同埋拎d入息證明俾我地影印。officer 拉左Technical manager入去幫手,
諗住Technical manager做主力, 佢從旁協助。
咁樣安排都好正常, 呢d情況應該搵個男人出來去壓住班人, 唔睇得都打得。
點知officer一同manager講話佢(指officer)要打電話俾上頭,
manager就好快咁拎個電話走左出房打, 結果全程都係由officer搞掂....


好彩班工人都算和善, 唔係有心上來搞事, 其間仲有人哈哈大笑添,
不然officer一個女仔好危險。有一個女工同officer講, 如果香港打人唔係犯法,
佢一早打左o個個二判, officer心諗: "我都想打左佢好耐喇" =v=|||


原本呢件事都唔想俾老闆知, 點知佢中途返左公司,
睇到officer o係度忙碌既情況, 佢立即打俾我地o個位潛左水既manager炳佢,
同埋講番officer o係度做緊乜, 叫佢快d返。
另外仲叫返左大陸o個位manager即刻返來添。
我地個潛水manager都算厲害, 一直俾人急call, 直到下午3-4點先返來。


後話:

今日有人通知officer小姐, 原來尋日有人通知公司其他人仕,
話公司俾人圍緊, 唔好返去住,
有人仲話尋日好彩technical manager o係度添...
officer即時火起, 佢唔mind technical manager邀功,
但係竟然有人阻止d同事返來救佢, 由得佢去死。
仲有o係咁既情況下班男人唔知去晒邊唔出來幫手...

 
--------------------------------------------------------------------------------


呢單野糾正了大家一些錯誤的睇法:
一提起工人追糧, 大家都會覺得佢地一定會兇神惡殺, 大吵大鬧, 原來未必喍喎。
好似呢班工人咁, 都冇乜野丫 ,  可能因為officer係女人掛


大家通常都會好同情冇糧出的工人, 但佢地向大判追糧,
係未真的只係追數咁簡單呢﹖分分鐘係同二判夾埋呃大判錢。
大判好難check d工人係未真的冇收過人工, 佢地上來話冇收過錢,
你唔俾佢又唔得, 而且你又唔知佢既上班記錄係未真的....
另外我地公司現在落緊標, 唔可以俾呢d負面消息影響, 結果只好按勞工法例,
支付不多於2個月既糧俾佢地。如果係平時, 可能會叫佢地去勞工處。


俾左錢後仲有排煩。點樣確保班工人之後都有糧出﹖
佢地收左錢後會唔會繼續做野, 依時完成工程﹖
如果今次由大判出糧俾佢地, 下次佢地會唔會又重施故技?  
如果同二判中止合作關係, 又要按排人手去接管工程